#Gujrati Gazals....

🌹🌹🌹❤❤❤🌹🌹🌹❤❤❤🌹🌹🌹

મને થતું : ઢળી પડીશ હું અમુક શ્વાસમાં
ભલું થયું, તમે મને મળી ગયાં પ્રવાસમાં !

હસી રહી’તી મંજિલો, તજી ગયો’તો કાફલો
થઇ રહ્યો’તો રાત-દિન દિશાઓનો મુકાબલો
ઊઠી ઊઠીને આંધીઓ તિમિ૨ હતી પ્રસારતી
રહી રહીને જિંદગી કોઇને હાક મારતી
મને થતું કે કોણ એને લઇ જશે ઉજાસમાં?

ભલું થયું, તમે મને મળી ગયાં પ્રવાસમાં !
ખરી જતાં ગુલાબને હવે ઝીલીશું ખોબલે
ઊડી જતી સુવાસને સમાવી લેશું અંતરે
ખડા થઇ જશું, વહી જતાં સમયની વાટમાં
ભરીશું હર્ષનો ગુલાલ, શોકના લલાટમાં
મને થતું કે ફેર કંઇ પડે હ્ર્દયની પ્યાસમાં
ભલું થયું, તમે મને મળી ગયાં પ્રવાસમાં !

વિકીર્ણ સોણલાંઓને વિવિધ રીતે સજાવશું
ઠરી ગયેલ ઊર્મિને હ્રદય-ઝૂલે ઝુલાવશું
હવે કદી પવિત્ર જળ ધરા ઉપર નહિ ઢળે
નયન-સમુદ્રથી જગતને મોતીઓ નહિ મળે
મને થતું : વસાવું આ સુવર્ણને સુવાસમાં
ભલું થયું, તમે મને મળી ગયાં પ્રવાસમાં !

તમે જ રાહ ને તમે જ રાહબર હતા ભલા ?
તમે જ શું દશે દિશા? તમે જ તૃપ્તિ ને તૃષા ?
ખરું પૂછો તો ‘આદિ’થી હતી તમારી ઝંખના
અદીઠને અનેકવાર મેં કરી છે વંદના
મને થતું કે એ જ છે હ્રદયની આસપાસમાં
ભલું થયું, તમે મને મળી ગયાં પ્રવાસમાં !

– ગની દહીંવાળા

🌹🌹🌹❤❤❤🌹🌹🌹❤❤❤🌹🌹🌹


❛જીવ મારો આ શરીરે ક્યારનો મુંઝાય છે
બ્હાર કાઢો બિંબને,એ કાચમાં ક્હોવાય છે.

હું નથી આકાશ કે મબલખ મને તારા મળે
એક બે મારા મળે તો રાત વીતી જાય છે.

આંસુઓનાં મોતી, આજે પણ ગમે છે એમને
એ સ્મરણમાં આવે ત્યારે આંખ ભીની થાય છે.

ફેંકતાં ફેંકી દીધા છે કૈંક પથ્થર પંખી પર
એટલે આ હાથ પથ્થરવત્ થતા દેખાય છે.

એ કબર ખોદી ભલે સુવે અમારી ગોદમાં
આવવા દો શૂન્યતાને, એ બ્હૌ હિજરાય છે.❜
- ચિનુ મોદી



🌹🌹🌹❤❤❤🌹🌹🌹❤❤❤🌹🌹🌹


❛એક મજા હોય છે.....

ક્યારેક જીવન જંગ લડવાની એક મજા હોય છે..
ક્યારેક ત્રણ એક્કામાં હારવાની એક મજા હોય છે...

સુખ આવે રડી લેવું ને દુ:ખ આવે હસી લેવું..
ક્યારેક હારેલી જીંદગીને બિરદાવવાની એક મજા હોય છે...

કિનારે બેસી છબછબીયા કરનારા શું જાણે..?
ક્યારેક મજધારે જઈને ડૂબવાની એક મજા હોય છે...

થોડીક રાહ જોઈ તમારી ત્યાં તો આવી જ ગયા..
ક્યારેક વિરહમાં રહેવાની એક મજા હોય છે...

જોયા છે જીંદગી આખી દોડાદોડ કરનારા..
ક્યારેક  હારેલા દિલને જોડવાની એક મજા હોય છે...

જાણીતી જ હોય મંજીલ ને મનગમતી પણ..
ક્યારેક જાણીને ભટકવાની એક મજા હોય છે...

આમ તો મળવાનું રોજ થાય જ છે ને..
ક્યારેક દુરથી જ નિહાળવાની એક મજા હોય છે...

હાથ જોડી નમતા જગદીશને ઘણા જોયા છે..
ક્યારેક હું મજામાં છું કહેવાની એક મજા હોય છે...

"જગત" ને જીતનારા સીકંદરો આવશે ને જશે..
ક્યારેક ખુલ્લી હથેળીને જોવાની એક મજા હોય છે...❜
- જગત


🌹🌹🌹❤❤❤🌹🌹🌹❤❤❤🌹🌹🌹



❛શ્રુષ્ટિના આ સચરાચરમાં
હું ગોપી કહેલાવું,

જો કાના તું આવે પાસમાં
તો મુરલી હું બની જાઉં,

જો આવે તો ઉષ્ણ ઋતુમાં
તો ક્ષણિક વૃક્ષ બની જાઉં,

અને આવે જો શિશિરમાં
તો તારી હુંફ બની જાઉં,

તારી ઇચ્છા હોય મુરલીમાં
તો રોમે રોમ વિંધાઉં,

ગોકુળની ચરતી ધેનુમાં
કંઠઘંટડી બની જાઉં,

વહેતી શીતળ સરીતામાં
તારી નાવ હું બની જાઉં,

જો તને હોય પ્રિત પંખીમાં
તો તારી પાંખ હુ બની જાઉં,

તારુ મન હોય મટુકીમાં
તો તવ મુખનું નવનીત બની જાઉં,

તને પ્રિત જો ગોવાળિયામાં
તો તારો મિત્ર બની જાઉં.❜


🌹🌹🌹❤❤❤🌹🌹🌹❤❤❤🌹🌹🌹


❛શબ્દોની મિત્રતા અને કાગળની મિત્રતા,
એકાંતે મ્હોરનારી આ હરપળની મિત્રતા.

આ હાંફ-તરફડાટ-તૃષા-થાક-ને તડપ-
કેવી રહી પૂછો નહીં મૃગજળની મિત્રતા.

પ્હેરણથી માત્ર રાખ્યું ન સગપણ ઉપરછલું,
માણી છે એની મેલી સળેસળની મિત્રતા.

આંસુથી રાખ કે પછી દરિયાથી રાખ તું,
ડુબાડી દેશે કોઇ દિવસ જળની મિત્રતા.

ચિરકાળ એની છાપ ફૂલો પર છવાઈ ગઈ,
નહીં તો રહી’તી બે ઘડી ઝાકળની મિત્રતા.

હરજન્મ બંધ દ્વારને ખખડાવતી રહી,
કેવી અતૂટ હાથ ને સાંકળની મિત્રતા.

આદિલ-અનિલ-રમેશ કે લા.ઠા. ચિનુની સંગ
કાયમની લીલી ગૂંજતા કાગળની મિત્રતા.❜
- મનોજ ખંડેરિયા



🌹🌹🌹❤❤❤🌹🌹🌹❤❤❤🌹🌹🌹